На Деновите на македонската книга што се одржаа во Московскиот дом на националностите во рамки на проектот „Читаj jа Македониjа!”, претставена беше книгата „Послание. Поезија на Блаже Конески на руски”. Најавена е и новата поетска збирка „100 песни на Блаже Конески во препев на руски” коjа се подготвува токму за јубилејот на поетот. Стогодишнината од раѓањето на Конески е вклучена во календарот на значајни настани за 2021 година на УНЕСКО.
Блаже Конески е истакнат македонски писател, јазичар и историчар, еден од кодификаторите на современиот македонски литературен јазик и значајна личност во македонската книжевност, втемелувач на македонистиката на Филолошкиот факултет во Скопје (кој денес го носи неговото име), ценет професор, еден од основачите и прв претседател на МАНУ. Конески по Втората светска војна активно се вклучува во стандардизирањето на македонскиот јазик и ја изработува граматиката на современиот македонски јазик. Го составил и правописот на македонскиот литературен јазик, а исто така бил уредник на „Речникот на македонскиот јазик“. Конески е основач на студиите по македонистика на Скопскиот универзитет.
Тој е роден во прилепско Небрегово, на 19 декември 1921, а починал во Скопје, 7 декември 1993. Денес неговата родна куќа во Небрегово е уредена во духот на архитектонскиот стил од крајот на 19 век, кога и била изградена. Објектите во дворот биле обновени и го задржале својот автентичен изглед, а дел од собите биле претворени во музејски простории и места за културни средби. Овој објект како значаен споменик на културата, припаѓа на руралната архитектура.