Првиот голем крузер заплови по Медитеранот по пауза од скоро пет месеци како резултат на пандемијата на коронавирус.
Крузерот MSC Grandiosa исплови од Џенова, Италија на седумдневно крстарење и планира да запре во три италијански пристаништа, како и во Валета, главниот град на Малта.
Компанијата MSC Cruises соопшти дека патниците и екипажот биле тестирани за коронавирус пред да се качат.
Крстарењето започна во време кога бројот на заразени лица низ цела Италија расте, а повеќе од 600 нови случаи беа потврдени во неделата. Италијанските власти ги затворија сите ноќни клубови, а носењето маски е задолжително од 18:00 до 6:00 часот на јавни места каде не е можно социјално растојание.
Од MSC Cruises велат дека крузерот ќе биде исполнет со капацитет од 70 проценти, така што се качија 2.500 патници за да се исполнат безбедносните мерки.
Италија е на седмото место на листата кога станува збор за бројот на патници на крстарења откако во 2018 година забележале повеќе од 800.000 патници, пишува Би-Би-Си.