Oпштина Центар на чија територија се наоѓа парцелата пред хотелот „Холидеј ин“ треба да одлучи за Деталниот урбанистички план и дали на таа локација треба да се гради или не, изјави министерот за транспорт и врски Благој Бочварски во интервју на „360 степени“ на телевизија Алсат-М. Според него, Општина Центар и градоначалникот Саша Богдановиќ може да побараат суспензија на Деталниот урбанистички план, кој ја вклучува и парцелата спроти хотелот „Холидеј ин“. Негов став е дека урбанизацијата треба да продолжи во согласност со потребите.
Говорејќи за новиот Закон за легализација на бесправно изградени објекти, Бочварски посочи дека тој ќе предвидува и високи казни со што би се одвратиле граѓаните да градат дивоградби. Вториот аспект е новиот Закон за урбанистичко планирање кој ќе овозможи урбанизирање на средините и поголем капацитет на општините да можат брзо да носат урбанистички планови, а третиот аспект е зголемување на капацитетите на инспекциските служби.
Како една од целите на новиот закон за легализација на дивоградбите ќе биде и решавање на статусот на општинските и државните објекти кои во минатото, иако биле изградени според редовни постапки, не биле впишани како постоечки, укажа Бочварски.